إزاى تتعود علي الصلاة وتستمر فيها مدي الحياة ف أسبوع 7 أيام !

8 مايو 2018
mahmoud 8 مايو 2018 لا يوجود تعليقات 457
إزاى تتعود علي الصلاة وتستمر فيها مدي الحياة ف أسبوع 7 أيام !
أولًا .. الصلاة قاعدة أساسية ف الحياة هيّ الخيط إللي بين قلبك وبين ربك ، وغير إنها ركن أساسي من أركان دينك ، هيّ الركن الوحيد ف الكون إللي هتلاقي فيه الراحة النفسيه والعصبيه والعقليه والجسديه ليك ، والأجمل كمان إنها بتنقيك وبتنقي روحك وتصفي نفسك وترفع من شأنك ومكانتك عن أي شخص بقربك من الله ، يبقي هنتفق إنها أعلي مكانه من الماية والاكل والنفس كمان ، لو الماية والأكل والتنفس بتحيي جسمك فا الصلاة بتحيي روحك بتنورك وتنور وشك وتصفي بالك من أي هموم وبتقصر عمر الوجع وبتجعل الخيبات هينه عليك ..
ثانيًا .. إزاي هتستمر ف الصلاة ، ” الصلاة تعود ” ..
1 _ أول يوم هتبدأ فيه هتصلي ركعة وحده لله ، سواء قبل ما تروح شغلك أو مدرستك أو جمعتك أو حتي خارج مع صحابك أو شخص ما .. وبالليل هتصلي ركعة وحده مش شرط قبل ما تنام المهم تصلي ركعه أخر النهار ..
2 _ تاني يوم هتصلي الصبح ف نفس الميعاد وحاول إنك تميز الميعاد ده وتستقر عليه هتصلي ركعتين لله بردوا قبل ما تخرج ولو قاعد ومش خارج صلي بردو .. وبالليل هتصلي ف نفس الميعاد ركعتين لله ، وخلاص ده بقي ميعاد كل يوم بالنسبالك مخصصه للصلاه دي ..
3 _ تالت يوم هيتم تعديل الميعاد ” لو بتسهر لبعد الفجر يبقي تصلي الفجر الركعتين ومتصلهمش الصبح ؛ لو بتنام بدري وتصحي بدري بس بعد الفجر يبقي تصلي نفس الركعتين لصلاة الصبح .. أما عن نفس اليوم بالليل فا هتصلي نفس الركعتين بتوعك ف نفس الميعاد ..
4 _ رابع يوم أنت خلاص ركعتين كل يوم صباحًا بقت ف أيدك ” الفجر ولو إتأخرت يبقي الصبح ” وعقلك ثبت فيه نفس الميعاد خلاص .. أما عن ركعتين كل يوم اخر النهار فا اليوم ده هيكونوا تلاته هنزود عليهم ركعة واحده وتصليها أخر النهار بردو بس ف ميعاد ” صلاة المغرب ” كده بقي أتعودت وعقلك أتاقلم ع الوضع الحالي ” الفجر ، المغرب ، ف أيدك ” ..
5 _ خامس يوم وده الأهم ، هنا أنت خلاص بعد ما مسكت يومك الصبح وأخر النهار لازم تمسك العصايه من النص عشان تثبت ع تعودك ويكون كل يوم ف جديد هتمسك نص يوم بصلاة ” الضهر ” أربع ركعات وأنت من جواك بتزيد حالة ( أنا عايز أصلي أكتر ) المهم الميعاد كده عد ع صوابعك تلاته ” فجر ، ظهر ، مغرب ” يلا هانت وتقف كف أيدك ..
6 _ سادس يوم دلوقتي هتلبي حالة ( أنا عايز أصلي أكتر ) وهتطبقها ف منتصف اليوم وهي صلاة ” العصر ” .. اربع ركعات فيهم أنت بتغسل قلبك وبتصفي بالك .. وصوابع أيدك زادت عليها عده رابعها وهي صلاة العصر وفاضل ليك أخر مرحلة وبكده هتكون إتعودت إنك تعمل حاجة بتحبها حب ف الله ..
7 _ سابع يوم وهو الأخير بتم أخر مرحلة ليك وهي الصلاة الخامسة صلاة ” العشاء ” .. وده ركنك الأخير إللي بيه قفلت صوابعك الخامسه ع بعض وبقت قبضه قويه ، أربع ركعات أنت بتصليهم بمنتهي الرضا والتصالح النفسي والهدوء وإتعودت خلاص إنك تصلي ف ميعادك وترضي ربنا ونفسك ..
ثالثًا .. أنت خلاص إتعودت وحبيت إللي إتعودت عليه وبتعمله وأنت عايز تعمله ، وف أسبوع واحد حياتك كلها إتغيرت 180 درجة للأحلي ، بتتنفس بحريه والخوف جواك قل عقلك منتعش وروحك صافيه تمامًا ، وهنا السعادة بتملاك وتخرج أي شعور سيء جواك ، هتحب نفسك جدًا.
رابعًا .. صلي ! مهما كنت بترتكب من معاصي وأخطاء صلي لو بتشتم أو بتسرق أو حتي بتعمل كل شيء حرام ، صلي والصلاة هتنزعل من قلبك الشر والأفكار السيئة وتثبت مكانها إيمان وحب وخير وسعادة إتاكد إن ربنا مبيكرهكش وشيل من عقلك موضوع إنه مبيحبكش ، ربنا مستنيك وعارف إنك هتعود إليه ، ودي فرصتك صلي لله قبل أن يصلي عليك الناس ك فرض ..
ابدأ يومك بركعة .