13 من أخطر و أشهر اسئلة مقابلة شخصية واجوبتها

اسئلة مقابلة شخصية واجوبتها

أخطر و أشهر اسئلة مقابلة شخصية واجوبتها

الانترفيو او ( مرحلة الوحش ) من اهم المواقف اللى بتقابلها فى حياتك المهنية لأنها هي الي هتأهلك لبداية العمل , بيبقي في اسئلة مقابلة شخصية بايخه جداا الحقيقه زى :-

ايه هى اهدافك المستقبليه او (شايف نفسك فين بعد 5 سنين )

و هنعرض معاكوا أهم 13 سؤال هتقابلهم تقريبا فى الانترفيو و ممكن تقف قدامهم و الاجوبة بتاعت كل سؤال.

1- كلمنا عن نفسك ( سواء بالعربى او بالإنجليزى )

و ده يعتبر اول سؤال و الاكثر انتشاراً و هنا هو مش عايز يتعرف عليك بمعلوماتك الشخصيه لأنها كده كده موجوده فى ال C.V  اصلا بتاعك قدامه

بس هنا بعد اما تعرف نفسك بمعلوماتك الشخصية الاساسية ( اسمك وسنك وكليتك ……)

اتكلم عن خبراتك اللى اكتسبتها وهتفيدك فى الشغلانه دى , عن كورساتك , عن مهاراتك.

ننصحك أيضا بقراءة :- كيفية عمل cv إحترافى سيرة ذاتية وأفضل نموذج سيرة ذاتية

 2- من أشهر اسئلة مقابلة شخصية واجوبتها ليه عايز تشتغل معانا ؟!

لازم تفهمهم انك مناسب للوظيفة بالظبط , وهتقدر تنفذ وعلى علم مهام وظيفتك , وكمان قد ايه انت محتاج الوظيفه دى وهتفرق معاك كتير كخبرة مش بس كمديات و يفضل متجبش سيرة المديات المهم الخبرة العملية الي اكتسبتها و الي هتكتسبها من الشغل.

 3- ليه لازم نشغلك انت بالذات ؟؟

هنا هتقول ان المهارات بتاعتك مناسبة تماما لمتطلبات الوظيفه وان عندك الشغف انك تبدأ فيها , مهم جداً هنا تتكلم بردو عن خبراتك بس بشكل عام تتكلم عن خبراتك في الحاجة الي هما طلبينك فيها و ازاي بتعرف تتعامل معاها و تحل المشاكل الي بتوجهك فيها.

4- ليه سيبت وظيفتك اللى فاتت ؟

مهما قولت اوعى تعيب فى صاحب الشركة اللى فات , او تعيب فى حد هناك حتي لو كان سيئ.

حاول تبان بمظهر احترافى وانك مبتاخدش المشاكل بشكل شخصى.

ممكن تقول انك مكنتش بتتعلم حاجه جديده وعايز تتطور من نفسك فى مكان تانى وتتعلم اكتر.

5- اوصف موقف او مشكلة وازاى اتعاملت معاها

حضر موقف انت فعلا اتصرفت فيه بذكاء وتبين ان عندك مهارة حل المشكلات , وهتتعامل بالطريقة دى مع معظم اسئلة مقابلة شخصية واجوبتها , المهم متحولش تختلق او تألف قصة عشان تبان جامد و عنتر زمانك لان صدقني لو ال HR او الي بيعملك انترفيو ناصح ممكن يعد يسألك حجات عن الموقف و يعرف من ملامحك و اجابتك انك بتألف و بتجيب قصة من وحي الخيال, خليك واقعي.

6 – ايه هى اهم نقط قوتك

قول نقط القوة اللى بتتوافق مع امكانيات الوظيفه , واللى تضمنلك نجاح فى الوظيفه وحضرهم برضه قبل الانترفيو بلاش ارتجال , مع ان الارتجال مش غلط او اقدر اقلك ارتجل بس لو خدت خبرات كتير و تقيل في الانترفيو لكن لو لسه بتبدأ و اول او تاني مرة لا حاول تحضر مش عيب.

7 – ايه هى نقط ضعفك

برضه نفس الكلام , اوعى تقول نقط ضعف ليها علاقة بالوظيفه , بس نقط ضعف مش هتفرق معاهم فى حاجه.

ممكن تقول انى بضعف ققدام الشيكلاته وانى بنسى اللى غلط فى حقى بسرعه.

ممكن تقول انك كنت سلبى بس صلحت نفسى وبقيت ايجابي.

ممكن تقول انك كنت انطوائى بس دلوقتى بقين انبساطى واجتماعى.

8- ايه هى اهدافك المستقبليه او (شايف نفسك فين بعد 5 سنين )

سؤال سخيف الحقيقه , بس الهدف منه يبان مدى طموحك واصرارك وثقتك بنفسك.

حاول متجاوبش إجابة اسخف من السؤال زى ( مكان مدير الشركه او فى نفس وظيفتى )

بس بدل من ده قول انك طورت مهارتك بدرجه معينه وانك مستقر فى شركتك وظيفياً , وانك كسبت ثقة الناس اللى حواليك وبقيت اهل خبرة وثقه.

9- ايه اللى خلاك تقدم فى الشركة دى بالذات ؟

حاول من السيرش اللى عملتة فى الليله اللى قبل الإنترفيو تبين انك مهتم ومعجب بالشركة وسياستها , (حاول تطبل يعنى ) , وانك شايف نفسك جزء من الشركة دى لان ليها نفس الخطوات والحلم بتاعك

10- متوقع تقبض كام معانا ؟

ودى بتبقى المفروض مرحلة التفاوض على الاجر , وهنا متقولش مبلغ اقل من الطبيعى لانك هتلبس فيه.

ومتقولش مبلغ اعلى لسببين , الاول لانه اعلى من ميزانية الشركة فمش هيقبلوك والتانى انك طماع وعايز اكتر من حقك.

ممكن تهرب من السؤال وتسأل عن ميزانية الشركة للوظيفه بتاعتك , او الاصيع انك تقول ان سعر الوظيفة بتاعتى فى السوق ( كذا ).

11 – ايه رأيك لو قلتلك انك اترفضت معانا ؟؟

ساعتها هو بيقيس مدى ثباتك الانفعالى وما عليك يا صديقى إلا ان تبتسم وتقول انك تكرمت بالتعرف عليهم و تشكرهم على وقتهم.

12- عايز تسأل اى سؤال ؟!

انت تسأل اذا انت مهتم , ممكن تسأل عن الشركة.
, او ازاى هتترقى او بعد ايه ؟؟

13- ايه هو اكبر فشل واجهته وازاى واجهته ؟!

وده مش حوار , قولتهم على موقف كان صعب فعلا بالنسبالك وانك اتعلمت منه كتير.

أقرأ أيضا اسئلة مقابلة شخصية واجوبتها :  

You might also like