التقديم لمنحة Chevening ممولة بالكامل – مجتهد

10 سبتمبر 2018

التقديم لمنحة Chevening بيقفل يوم 6 نوفمبر 2018

انا قدمت للمنحة السنة الماضية 2017 واتحصلت على قبول غير مشروط من 3 جامعات بريطانية وهي Aberdeen خامس اقدم جامعة في بريطانيا ومقرها اسكتلندا و Roehampton و Middlesex في العاصمة لندن لدراسة ماجستير دراسات الترجمة Translation Studies وتم اختياري في ال short-list وعملت المقابلة بتاعتي في السفارة لكن اسمي ما طلع ضمن ال final-list بس اقدر اقول اني خلصت 75% من المشوار وانها كانت تجربة ممتازة جدا طلعت منها بعدة دروس مستفادة حبيت اشاركها مع الناس الحتقدم السنة دي على امل انها تنفعهم وتسهل عليهم المهمة لان التقديم لمنحة Chevening عملية طويلة مرهقة بتطلب صبر ودراية كاملة بتفاصيل وخطوات التقديم.

انا ما ح ادي مقدمة طويلة عن المنحة وفكرتها ولا ح اتكلم عن طريقة وخطوات التقديم باسهاب لان افتكر في عدد كاف من البوستات نشرت خلال السنين الماضية وحتى فيديوهات بشوية بحث حتلقاها ده غير ان موقع المنحة فيه اجابات على اغلب الاسئلة الشائعة المتكررة. لكن عايز اشارككم بعض النصائح والتوجيهات المتفرقة، من الاهمية بمكان، تسليط الضوء عليها ولفت الانتباه ليها، عشان الناس تركز عليها وتضعها في الحسبان وبالتالي تزيد فرص قبولها في المنحة وهي كالاتي:

1- تقديمك للمنحة وتقديمك للجامعات خطين متوازيين، يعني ما تنتظر يقبلوك في ال short-list عشان بعدها تمشي تقدم للجامعات! او تتحصل على قبول غير مشروط من الجامعة حتى بعدها تقدم للمنحة! ده خطا كبير جدا وفعلا لاقيت ناس ضاع عليهم التقديم بسبب معلومة خاطئة زي دي. عشان كده قدم للجامعات والمنحة في نفس الوقت مع مراعاة اختلاف متطلبات التقديم للجهتين.

2- ما تشغل بالك كتير بقصة انك لازم تكون متخرج بالدرجة الاولى او الدرجة الثانية القسم الاول، انا كمثال متخرج بالدرجة الثالثة وقدمت لثلاثة جامعات مختلفة اتحصلت منها على قبول غير مشروط. بس دي حالة بتتطلب يكون عندك حاجة مختلفة وانجازات حقيقية تقلل الفجوة في درجتك الجامعية وتشفع ليك قدام مسؤول القبول في الجامعة وتقدر تثبت انك قادر على انهاء الكورس المعني بنجاح، بضرب الامثلة من واقع انجازاتك ما بعد الجامعة في المجال الاخترت تواصل فيه، ويكون عندك مهارات قيادية او شاركت في مشاريع تعكس شخصيتك القيادية وتدلل على انك شخص يتوقع منه شيء مفيد لمجتمعه في المستقبل بعد انهاء الكورس الانت مقدم ليه، والاهم من ده تقدر تصيغ الكلام ده كله بطريقة احترافية ممتازة في طلب التقديم للجامعة لان مر علي ناس مؤهلين للمنحة من ناحية اكاديمية بس عندهم مشكلة في التعبير وصياغة الافكار بطريقة تضمن ليهم المرور بنجاح حتى قدام ال reading committee الخاصة بالمنحة.

3- ال personal statment البترسلها للجامعات هي الممكن توديك لقدام او بناء عليها يتم استبعادك، يعني دي الحته البتقول فيها انا ارهب زول واخطر زول في المجرة وعارف نفسي بعمل في شنو والكورس الانا مقدم ليه ما قدمت ليه من فراغ! بل عندي تجارب وخبرات عملية ومشاركات تطوعية سابقة في نفس الحقل الانا مقدم فيه وبتدلل ان انا بفهم ولو القليل في الكورس الانا مقدم ليه. ومن المهم جدا التنبيه ان تواضعنا المخل كسودانيين في حاجات مفصلية زي دي بودينا في ستين داهية وبضيع علينا فرص ثمينة بسبب ضعف مهارة من مهارات التواصل عندنا وليس كوننا اقل من التحدي او غير مستوفين الشروط! ولان دي مساحة اتيحت ليك to sell yourself وتقنع فيها مسؤول القبول في الجامعة ان انا “استحق” مقعد لبرنامج الماجستير في جامعتكم وتقدم الادلة والبراهين على كلامك في شكل روابط لمشاريع سابقة شاركت فيها او ملفات زي الصور تدعم كلامك وترفعها في Google Drive مثلا وتاخد رابط الملف وتضيفه لل personal statement الحترسلها للجامعة بس مهم جدا تكون منظمة ومنسقة بشكل احترافي وافكارك تكون واضحة وبتقود لان انا الشخص المناسب لشغل مقعد في جامعتكم السنة دي.

4- من خلال خاصية course finder البقدمها ليك موقع المنحة وهي اداة تقدر من خلالها تبحث عن الكورسات وبقدم ليك ملخص عن الجامعة والكورس المعني. من خلالها، لازم تفتش عن الموقع الرسمي للجامعة الاخترتها وتقرا تفاصيل الكورس الاخترته بالحرف وبالذات متطلبات القبول زي الدرجة المطلوبة في شهادة ال IELTS واذا كنت مطالب بارفاق مستندات معينة او انهاء اختبار معين بتحدده الجامعة وترفقه مع طلب التقديم واذا شكيت في اي معلومة وبالذات درجةال IELTS المطلوبة للقبول رسل ايميل لقسم القبول في الجامعة واستفسر عن المعلومة المحتاج ليها عشان تتفادى ان الموقع ما يكون updated ومن تجربة شخصية الناس دي محترمة وبتديك اكتر من الانت عايزه اذا طلبت المساعدة وفعلا الشخص البرد عليك بكون الشخص المناسب في المكان المناسب.

5- من المفترض تقدم لثلاثة كورسات ماجستير، بالتالي مهم للغاية ان الكورس الحتقدم ليه يكون هو نفسه او 3 كورسات قريبة لبعض في المحتوى والتوجه، بمعنى لا يعقل تكون خريج ميكانيكا تقدم لماجستير ترجمة وماجستير ادارة اعمال وماجستير في الميكانيكا! غالبا، ما حتدخل ال short-list اصلا لان ده بيعكس انك مشتت الذهن، وبالتالي تفتقر لخطة مستقبلية واضحة، ده غير ان السؤال الرابع في استمارة التقديم متعلق بخطتك بعد نهاية الماجستير career plan فبالطريقة دي ما حتقدر تجاوب عليه اجابة واضحة مقنعة!

6- في اجابتك على اسئلة ال application الاربعة تفادى تماما الاخطاء الاملائية او النحوية وخلي فيض افكارك يكون سلس ومرتب وواضح ومن الافضل تستغل كامل المساحة المعدة للاجابة بدون اسهاب وحشو زائد او تفاصيل مملة ما بتخدم اجابة السؤال. ولم تبدا الاجابة على اي سؤال، ابدا باقوى واهم معلومات عنك واتدرج في الاهمية والتفصيل بحيث انك تشد انتباه مسؤول اللجنة reading commeettee وتجبره يواصل قراءه للاخر ويقتنع ان اجابتك غطت السؤال من كل الجوانب، وانك كتبت كلام مقنع مدعم بالادلة والبراهين الانت قدمتها.

7- امتحن لل IELTS من بدري وقبل زمن كاف، ويفضل خلال ما تبقى من السنة الحالية، عشان لو ما احرزت النسبة المطلوبة للجامعة او المنحة يكون عندك متبقي زمن تمتحن تاني، ومن المهم التنبيه ان امتحان ال IELTS مرهق عشان كده يوم الامتحان امشي وانت نايم كويس ونفسيا مرتاح ومهيء لثلاثة ساعات متواصلة هي زمن الامتحان ده غير زمن تجهيز القاعة وتوزيع اوراق الامتحان، يعني انت بتدخل القاعة الساعة 8 صباحا بتطلع منها الساعة 1 ظهر. يوم الامتحان انا كنت راجع من سفر بعد اسبوع طويل مرهق، وصلت المطار الساعة 3 صباحا، دخلت البيت الساعة 5 والساعة 8 كنت داخل قاعة الامتحان طلعت منها الظهر، كنت فاقد للتركيز بنسبة كبيرة والنتيجة كانت 6.5 في امتحان ال IELTS ما بتعكس مستواي الحقيقي لكنها كانت كافية للتقديم للجامعات والحصول على قبول منها واستيفاء شرط اللغة للمنحة، بالتالي لم تمشي الامتحان امشي وانت مرتاح ذهنيا وبدنيا من اجل تركيز واداء افضل.

8- الجامعات بتبحث عن تفوقك الاكاديمي وشيء من روحك القيادية ولجنة المنحة بتبحث بالكامل عن تفوقك كقائد ولاي درجة متوقع يكون ليك مستقبل مؤثر في بلدك عشان كده انت مطالب تكون مقنع للاثنين، بالتالي جهز نفسك وفصّل طلب التقديم للجامعات والمنحة واجاباتك على اسئلة لجنة المقابلة بناء على هذا الاساس.

9- اذا تم اختيارك في ال shortlist وتم دعوتك للمقابلة، امشي وانت مجهز اجاباتك على كل الاسئلة المتوقعة، واعرف ان الغرض من المقابلة التاكد من انك صاحب شخصية قيادية، وواثق من نفسك، وعندك خطة مستقبلية جاهزة، وده بيظهر من اجاباتك الواضحة، بالتالي ما تركز على انك تشيل معاك شهادات واوراق كاثبات على كلامك لانهم بعتمدو مبدا الثقة في كلامك الانت كتبته قبيل في طلب التقديم للمنحة. انا ما عارف الباقين حصل معاهم شنو، لكن من تجربتي الشخصية ما حيشوفوها اصلا، وممكن ما يدوك الفرصة توريها ليهم، لان الغرض يتعرفو عليك انت كشخص، ويسمعو منك بعيدا عن الشهادات الشاركتها في مرحلة التقديم. بالنسبة لاسئلة المقابلة كلها بتدور في فلك مهاراتك القيادية ونقاش حول اجاباتك للاسئلة في طلب التقديم للمنحة وخطتك بعد ما ترجع بشهادة ماجستير من بريطانيا وبعض السيناريوهات التخيلية وطيف واسع من الاسئلة عشان كده من المفيد جدا تتواصل مع اشخاص دخلو المقابلة وتستفيد من تجربتهم في حال تم اختيارك ضمن ال short-list.

10- خلال المقابلة، ركز انك تجاوب من واقع تجارب عملية سابقة استفدت منها، يعني مثلا، اذا كان السؤال عن مدى استفادتك من برامج اعداد قادة شاركت فيها، جاوب على السؤال من واقع برامج او ورش شاركت فيها سلفا، ودلل على شكل الاستفادة دي بامثلة، وليس برامج مستقبلية متوقع انك تشارك فيها ده كله عشان تثبت انك بتمتلك المهارات المطلوبة سلفا.

11- اذا لم يتم اختيارك في المنحة دي ما نهاية العالم، ولا معناه انك اقل من الناس الفازو بالمنحة. مرات اللجنة القائمة على المنحة بكون عندها نظرتها الخاصة بما يخدم اهداف الجهة المقدمة للمنحة، اما اذا ارتكبت اخطاء في السنة الحالية قدم من جديد السنة القادمة مع تلافى الاخطاء السابقة. المهم في الامر، كونك دخلت ال short-list من بين المئات ان لم يكن الالاف المقدمين للمنحة اذا انت فيك حاجة مميزة لفتت الانظار ليك، بالتالي ما تحصر كل امالك في Chevening وقدم لغيرها سواء منح ماجستير او زمالات او ورش تدريبية او كورسات قصيرة. انا لم وصلني ايميل الرفض كنت وقتها في كينيا، تبع منحة مبادرة القادة الافارقة الشباب YALI RLC، فالفكرة انك ما تركز جهودك كلها في مكان واحد وتقعد تنتظر! بل قدم في اي فرصة انت شايف انها حتخدم مسارك الاكاديمي او المهني في المستقبل، بالتالي تاثير الرفض ما حيكون كبير، والفرصة الحتفوز بيها من بين عدة فرص ضائعة حتكون عتبة لانك تفوز بفرصة قادمة.

12- في حال لم يتم اختيارك ضمن ال final-list بعد المقابلة، رسل ايميلات للجامعات تطلب منها تاجيل القبول غير المشروط الحصلت عليه للعام الجامعي القادم بحيث انك تقدر تقدم للمنحة العام القادم وانت قبولك من الجامعة جاهز سلفا.

13- معلومة مهمة جدا: التقديم للمنحة خلال السنة الحالية 2019/2020 حصل فيه تغيير بالنسبة لشهادات التوصية recommendation letters السنة الماضية بتجهز شهادات التوصية وترفعها بنفسك على طلب التقديم في حال تم دعوتك للمقابلة، لكن حاليا مفترض تختار اسم الشخص الموصي وحيترسل ليه ايميل عن طريق موقع التقديم للمنحة وهو الحيرفق شهادة التوصية بنفسه حسب طلبك وعندك فرصة لحد يوم 25 فبراير 2018 عشان تكمل الاجراء ده من يوم اعلان ال short-list في يوم 14 فبراير 2019 غالبا.

في الاخر كله توفيق من ربنا، بس انت تبذل اقصى ما عندك، وتلتزم بكل التوجيهات، وتحاول تطبق كل النصائح المهمة البتمر عليك، وما تضيع الزمن الكتير المتاح حاليا وتتحرك بعدين في الزمن بدل الضايع!

سلام ومحبة وتوفيق للجميع

المصدر :- #Riyad_Almubarak