مجال البرمجة من احسن المجالات اللى ممكن تدخل فيها وتخليها حياتك المهنية ومن اكثر المجالات ربحاً ومتعة , بس برضه زية زى اى مجال تانى ممكن تلاقى صعوبات فى تعلمة وبدايته

قبل مندخل في النصائح العامة في مشوارك في البرمجة دول كتابين مهمين جدا لازم تخليهم معاك و تتطلع عليهم دايماً لأنهم هيفيدوك جداً

1- كيف يتعلم المبرمج بشكل صحيح ؟

2- مختصر دليل لغات البرمجة

ومن اهم النصائح اللى لازم تعرفها فى تعلم البرمجة  :-

1- اصبر

مجال البرمجة مش هتتعلم فيه من يوم وليلة , انت محتاج وقت طويل شوية علشان تشتغل صح وتبدأ تكسب فلوس , خصوصاً لو انت هتشتغل Freelancer

2 – اعرف طريقك

البرمجة مش لغة ولا اتنين , ده فيه لغات برمجه كتير جدااااا , حدد انت عايز تتعلم وتبدأ بأنهى لغة مرورأ بلغات ايه ووصولا لأنهى لغة , ويفضل تبدأ بلغة ( البايثون ) لانه بيقال انها الأسهل

3 – التمرين بإستمرار

يفضل يومياً تتدرب على اللى اتعلمتة لانه فية مئات الاكواد , ولو بطلت تتمرن الأكواد هتتنسى زى اى لغة عادية

4 – اشتغل مجانا

اشتغل مجانا بس اشتغل , اتطوع فى مشاريع سواء بفلوس او مجانا مهم انك تعرف سوق العمل طالب ايه , لإن مهم جدا انك تعرف سوق العمل بتاعك كويس

5 – اتعاون مع أصدقائك

حاول تساعد اصدقائك فى مشاريعهم , لان ده هيساعدك على تبادل الخبرات وتثبيت المعلومات فى دماغك , وهيهون عليك الوقت برضه

6 – اهتم بالدراسة

لو مش ناوى تشتغل ( عمل حر – Free lancer ) حاول تهتم بالشهادة الجامعية ,او المعاهد ( خصوصاً فى مصر )

7 – نظم وقتك

مهم جدااا انك تخصص عددساعات معين فى اليوم تطبق فيه اللى اتعلمتة , او انك تستشير اصدقائك على اللى انت مش عارفة

8 – ابعد عن التسويف

وهو انك تقول هبدأ بكرة , وانت ليه متبدأش دلوقتى  , ابدأ فى الوقت اللى قررت فيه تتعلم برمجة , واعمل لنفسك اهداف ومهام تخلصها

9 – اجتهد

لو فكرت تاخد كورس , اوعى تفتكر ان المدرب هيديك البرمجة بمعلقة او هتشرب البرمجة مثلا , المدرب هيديك مفاتيج اللغة وانت عليك انك تجتهد وتدور وتعرف من مصادر العلم المختلفة

#عافر