تجارب سفر | تجربة سفر لأندونسيا – مجتهد

22 سبتمبر 2018
,, ADMIN 22 سبتمبر 2018 لا يوجود تعليقات 115

التجربة ل
1-Sara Hegazi
2-Rudy Winchester

انا حابه اتكلم عن مدينه ماحدش يعرفها كتير في اندونسيا ، لأن ناس دايما بتتكلم عن بالي ،ا
بتاخد طياره بحوالي ١٥ -٢٠دولار من كوالالامبور وتنزل مطار ميدان ومن ميدان بتركب باص عام علي مدينه جنبها اسمها بوكيت لاواج
Bukit Lawang,
هتتدفع حوالي ٩٠ جنيه مصري هتوديك لو مواصلات عامه ،
لو عربيه خاصه جايه من الفندق هتتدفعلك حوالي ٧٠٠ ج

المدينه تجنن ،عامله زي الجنه هيا مدينه صغيره بس الحاجه اللي بتميزها انها علي نهر وجنب الغابه ،
حاجه كده في الخيال احلي من بالي الف مره

، بتروح تقعد علي النهر ده في اوضه لوحدك بالفطار ب ١٥٠ ج ولو انتم اتنين كل واحد هيدفع خمسه و سبعين ،

الغابه هناك بقي حكايه تانيه خالص ،بتضيع في الغابه في وسط الحيوانات والشجر والانهاروالشلالات ،
بتحجز رحله هناك تروح فيها الغابه ، ممكن تقعد يومين ، تلاته ، ممكن سبع ايام زي ما انت عاوز انت والجروب اللي طالع معاه ، وانت راجع بترجع عن طريق الرافتنج في النهر

لو مروحتش المكان ده لما تسافر بالي اندونسيا يبقي فاتك نص عمرك 😱😱
waterboom
هترجع كانك عندك 5 سنين من احلي الملاهي المائية الي ممكن تستمتع بيها ومينفعش تفوتهاااا … هتروح الساعة 10 الصبح هتقضي فيها يوووم كااامل لحد الساعة 6 المغرب لعب و تنطيط هتبقي مهدود من اللعب ومش هتقعد تستريح برده😂 عشان بجد مينفعش تضيع وقت في المكان ده كمان البسين هناك تحفة وكبير جدااا و فيه زي امواج صناعية كده😍…من ضمن الملاهي فيه بقا زوحلية جوه المفروض انها خطر ناس كتير بتخاف منها وبتطلع لحد فوق و مش بترضي تلعبها .. اول حاجة هي علي ارتفاع عالي جدا جدا و مقفولة بتدخل جواها من فوق بتبقي واخدة شكل الصندوق وانت لازم تربع ايدك كده زي وضع الفراعنة في التوابيت 😂 ده اجباري عشان السلامة وفجأة الارض الي انت واقف عليها تتفتح وتقع كده في سلقط ملقط بتخض اوي بس جميلة😂.. ممكن تشوفو فيديوهات ليها ع اليوتيوب.. فيه مطاعم جوه بس الاحسن تبقو رايحين فاطرين الصبح ومعاكو سناكس كتيير و في اخر اليوم ابقو اتغدو بره لان المطاعم جوه غالية شوية عن برة .. كمان هتاخد مفتاح لوكر ليك تحط فيه حاجتك طول النهار عشان تبقي حر و تتحرك زي مانت عايز..
سعر التذكرة 35 دولار للكبار ممكن تدفع بالدولار او مايعادلها من عملة البلد
تذكرة الاطفال اقل شوية بس مش عارفة كام بصراحة… وممكن كمان تحجزو اون لاين من الويب سايت بتاعهم