تجارب سفر | تجربة سفر لليونان – مجتهد

22 سبتمبر 2018
,, ADMIN 22 سبتمبر 2018 لا يوجود تعليقات 141

التجربة لصاحبها Pola Salem

طيب خلينا متفقين كدة ان اللى سافر اليونان و قضى سفريته فى اثينا اللى هى العاصمة بس و مراحش الجزر يبقا اكنه ما سافرش!
حقولكم ليه بعدين فى بوست لوحده بتاع الجزر اللى زرتها فى اليونان…
طيب لو حصل و سافرت اليونان و ماعندكش وقت تروح الجزر يبقا تروح جليفادا جنوب اثينا ع البحر الشواطىء هناك حلوة جدا و مناسبة للاطفال بمعنى ان مهما دخلتوا جوة فى طول!
دخول الشاطىء بيكلفك ٥ يورو للفرد و ليك شازلونج لكل فرد و شمسية و موجود اوضة تغير فيها هدومك و كمان لوكر تحط فيه لبسك و شنطك!

الشاطىء هناك رملى و نضيف جدا الصراحة و فى مطعم و بار …
احنا كنا مأجرين شقة قدام الشاطىء و ممكن يتراح بالمترو لو انت فى اثينا او الاتوبيس و بينزلك قدامه بالظبط فا تروح تضرب غطس و تقضى وقت لطيف و ترجع تانى.

ماينفعش تزوروا اليونان من غير ما تجربوا طبق الاخطبوط، مشوى او مسلوق ليه كذا طريقة بيتعمل بيها و بيعتبر واحد من اشهر المأكولات البحرية فى اليونان!
انا عن نفسى بحب الاخطبوط المشوى و عليه زيت زيتون و مرشوش عليه زعتر!
حد فيكم جرب قبل كدة طبق الاخطبوط؟ او هل عندكم استعداد تجربوه؟ 🐙🌊🇬🇷

شاطىء ايوفيللى موجود فى جزيرة ليفكادا / اليونان
ممكن توصله عن طريقين
الطريقة الصعبة انك تروح بالعربية بس حتركن بعيد جدا و حتمشى على رجلك حوالى نص ساعة

الطريقة السهلة انك تاخد مركبة بتطلع كل ساعة و بتدفع ٦ يورو ل رايح جاى من الميناء القريبة منها و ١٠ دقايق و توصل!