تجارب سفر | فرنسا (باريس) سويسرا (چينيف، انترلاكن) إيطاليا (ڤينيس، فلورانس، بيزا، روما) – مجتهد

  • الرئيسية
  • تجارب سفر
  • تجارب سفر | فرنسا (باريس) سويسرا (چينيف، انترلاكن) إيطاليا (ڤينيس، فلورانس، بيزا، روما) – مجتهد
22 سبتمبر 2018
,, ADMIN 22 سبتمبر 2018 لا يوجود تعليقات 140

التجربة لصاحبها Amr Abou Samra

بما إن دي أول تجربة سفر ليا، فالبوست ده هيفيد أكتر الناس اللي ماسافرتش قبل كدة خصوصاً إن جميع الترتيبات من أول التأشيرة لغاية الرجوع كان ١٠٠٪؜ ترتيب شخصي بدون الاستعانة بمكاتب أو شركات سياحة

الرحلة كانت ١٣ يوم بالضبط في ٣ دول؛ فرنسا (باريس)- سويسرا (چينيف، انترلاكن) – إيطاليا (ڤينيس، فلورانس، بيزا، روما)

هحاول اتكلم عن الحاجات اللي استفدتها من التجربة بدون الدخول في تفاصيل مكررة زي تزور إيه وتركب إيه لإن كل ده موجود في أماكن كتير والبوست مش هيضيف جديد عن اللي اتقال

أولاً التأشيرة أخدتها من جدة في السعودية، وقدمت الأوراق العادية الموجودة في الـchecklist من غير تجويد من عندي (حطيت plan مع الورق للأماكن اللي هزورها وهتكلم عن الويب سايت اللي عملتها عليه بعد شوية)، التأشيرة طلعت ٣ شهور مالتي على جواز أبيض ليا ولمراتي

الحجوزات كانت كلها مبدئية (مش مدفوعة) سواء طيران أو فنادق
بعد التأشيرة حجزت تذاكر الطيران عشان أحدد البداية والنهاية للرحلة وبدأت أخطط هزور مدن إيه وهزور إيه فيها وعلى أساسه حددت الأيام في كل مكان ولما استقريت ع البرنامج تماماً بدأت أحجز تنقلات المدن وتذاكر الأماكن زي ديزني ومتحف واللوفر وغيره

اعتمدت في البحث بشكل أساسي على ٣ مصادر:

– الناس اللي أعرفهم بشكل شخصي راحوا الأماكن دي
– تجارب الناس ع الجروب هنا
– الانترنت وده كان النسبة الأكبر (YouTube – Trip Advisor – ويب سايت الأماكن السياحية اللي هزورها)

كنت محتاج كل اللي طلعت بيه يكون مكتوب ومترتب
اعتمدت على ويب سايت جميل اسمه inspirock.com
الجميل في السايت ده إنك بتحدد تواريخ رحلتك ومواعيد تواجدك في كل مدينة وطبيعة اهتماماتك ويومك بيبدأ ويخلص امتى وهو بيحط الخطة ع الأساس ده، بعدها تقدر تعدّل براحتك أو تزود أماكن وتشيل أماكن، فيه مزايا تانية كتير زي إنه بيقولك لو أنت حاطط حاجة في ميعاد هيا بتكون قافلة فيه بينبهك (زي مثلا لو حطيت زيارة اللوفر يوم الثلاثاء)
أخدت الأماكن دي وزوّدت الأماكن اللي أنا عايزها كمان وبدأت أرتب حسب أماكنهم ع الخريطة وإيه جنب إيه وأفلتر وأشيل الحاجات اللي أنا مش عايزها لغاية ما وصلت لخطة أخيرة حجزت على أساسها التنقلات والتذاكر بتاعت الأماكن

المرحلة الأخيرة كانت تجميع معلومات عن كل مكان هروحه من ويكبيديا والأفلام الوثائقية وغيره عشان ماتبقاش الزيارة لشوية شوارع وطوب وخلاص، وكتبت المعلومات دي في جزء الملاحظات على نفس السايت
بعد ما خلصت فيه إمكانية إنك تنقل الـplan على الـcalendar فخليت البرنامج ع الموبايل وطبعته برضه
الحمدلله التخطيط فرق معايا جدا، أنا مش بس كنت مخطط هزور إيه يوم إيه، لأ مثلا كنت مخطط هزور ديزني يوم كذة وهلعب فيها كذة وإيه اللي فيه fastpass وإيه اللي مافيهوش