غلطات بتتعمل اثناء مراجعة ليلة الامتحان

13 مايو 2018
Mayar 13 مايو 2018 لا يوجود تعليقات 83

مراجعة المنهج و بالذات ليلة الامتحان مهمة جدا و عشان كدة لازم تقدر تستغلها كويس و مينفعش تضيع الوقت فيها

عشان تخلى المراجعة فعالة فعلا فى شوية حاجات لازم تاخد بالك منها

 

1_ مراجعة قبل الامتحان بس

كتير من الطلبة بيبداوا يراجعوا قبل الامتحان و ممكن يقعدوا شهر كامل ميحاولوش يشوفوا المعلومات فبالتالى لما يجوا يراجعوا بيحسوا انهم مش فاكرين اى حاجة

لازم ساعة كل اسبوع تراجع فيها اللى انت قريتة او فهمتة قبل كدة مجرد قراية

 

2_  مذاكرة بدون تخطيط

بتذاكر من غير ما تحدد عليك تذاكر اية و فى وقت قد اية و اية المهم و اية الاهم

لازم تحدد المادة اللى عاوز تراجع عليها و بعدين تحدد هتراجع انى اجزاء جوا المادة الاول حسب الاهمية او السهولة

 

3_ التجاهل

بعض الطلبة مبيذاكروش او مبيراجعوش اجزاء معينة افتراضا منهم انها مش مهمة او انها مش هتيجي فى الامتحان

و دة بسبب ضيق الوقت و كتر مصادر المذاكرة عشان كدة لازم تبقى مجهز مصدر تذاكر انت منة ليلة الامتحان و يبقى شامل كل حاجة و مش محتاج تضيع وقتك

 

4_ قراءة المعلومات

المراجعة بالنسبة لبعض الطلبة هى قراية المعلومات و لكن فى الحقيقة هى انك تكرر قراية المعلومات و تسمعها و كمان تحل امتحانات السنين السابقة

دة بيساعدك تراجع على اكتر من نص المنهج فى وقت قليل

 

5_  الاكل

كتير من الطلبة بيجي عليهم وقت الامتحانات و مبيهتموش بالاكل و ممكن ميفطروش او يقعدوا فترة طويلة من غير اكل

بالذات ليلة الامتحان بيعتقد الطلبة ان الاكل مضيعة للوقت بس الحقيقة ان دة سبب اساسى لقلة التركيز فى الامتحان

و الاكتر ان انت هتلاقى مشكلة فى حفظ المعلومات او فهمها

 

6_ النوم لوقت مش كافى

المعدل الطبيعي للنوم بيبقى من 6 ل 8 ساعات بس الطلبة بيجوا فترة الامتحانات و بيناموا بس 4 او 5 ساعات

النتيجة ان بيحسوا بارهاق و عدم تركيز و الضغط انهم لا قادرين ينجزوا اللى وراهم و لا قادرين يركزوا و الوقت بيعدى

و نتيجة دة ان بيبقوا عصبيين و بيفقدوا تركيزهم تماما

 

7_ شرب الكثير من المنبهات

بيلجا الطلبة فى فترة الامتحانات انهم يشربوا قهوة او نسكافية او غيرهم من المنبهات

لان دة بيزود تنبيههم و يساعدهم على التركيز و السهر

بس اتضح ان الاصراف فيها غلط جدا لان المنبهات بتقلل عنصر الحديد من اى طعام بيتقبلة الجسم بنسبة 40%

 

8_  كتر المصادر للمراجعة

ممكن مادة واحدة بس فيها اكتر من مصدرين او تلاتة تراجع منهم

دة اكتر شئ غلط لانة بيشتت الانتباة و بيخليك مش عارف تركز فى مصدر واحد

الافضل انك تقرا كل المصادر و تعرف انى افضل فيهم او تعمل انت مصدر بيضم كل المصادر دية

 

Made by Mayar Mohamed