شوية مبسوط وشوية حزين , شوية ملئ بالأمل وشوية مكتئب ومتشائم

تقلب المزاج من الحاجات الى ممكن تبعد الناس عنك , وبيقولوا عليك ( انت بحالات – انت مجنون ولا ايه؟ )

طب ايه هى اصلا اسباب ان يكون مزاجك متقلب ؟؟! :-

 

 اولا :- الأسباب النفسية زى :-

1 – اضطراب فرط النشاط

وده اللى بتحس بسببه انك مش عارف تتواصل مع الناس وحاسس دايماً بالنقص وده طبيعا بيجيبلك اكتئاب .

واحيانا تكون متعرفش ان الشخص ده عنده الإضطراب ده اصلا , علشان كده لو عندك حد عنده الإضطراب ده لازم تراقبه كويس علشان على طول فى بيتحول لحالة الإكتئاب

2- اضطراب ثنائى القطب

وده واحد من الامراض المنتشرة جداا فى الولايات المتحدة ومن نتائج المرض انهم بيعانوا من الإسراف فى الأموال ومش بيقدروا يناموا كتير , وبرضه التغير المفاجئ فى المزاج

3 – الإكتئاب

المرض رقم 1 انتشارا على مستوى العالم , ودول الناس اللى بيلبوا وشوش كل يوم فى حياتهم , وممكن منكتشفش اننا مصابين بالإكتئاب ,

واللى ممكن من مضاعفاته , الإنتحار

4 – التوتر والقلق

وكلنا بنتعامل مع التوتر والقلق بأساليب مختلفة فمثلاً مننا اللى ( بينام كتير – الأكل الكتير – الخناق مع الأهل ……..)

ثانياً الأسباب الغير نفسية

1 – عدم التوازن الكميائى

الجسم مش شوية عظم ودم , الإنسان جواه تفاعلات كميائية ومواد كتيرة جدااااااا , علشان كده جسم الإنسان معقد جدااا

وأى لغبطة فى التفاعلات الكميائية اللى بتحصل داخل الجسم , بيحصل مشاكل واضطرابات وحاجات تانية كتير

واكتر الحاجات اللى ممكن تأثر فى تغير المزاج هو ( الدوبامين والسيروتين ) اللى اى اضطراب فى المستويات بتاعتهم بيحصل مشاكل كتير فى الجسم

2 – الخرف

مع كبر الإنسان فى السن , يصاب بمرض الخرف , ومن اصعب المشاكل اللى بتقابل الإنسان مع الخرف , التقلب السريع فى المزاج

3 – التغيرات الهرمونية ( هام جدا )

وده بقى بتقابلنا كلنا فى حياتنا لأن هروموناتنا بتتغير كتير فى مراحل كتير من حياتنا يعنى بالنسبة للبنت فالهرمونات بتتغير فى مراحل ( الحمل لما بينقص الإستروجين ) وكمان بتعانى من ضعف الثقة واللى بيخليها متقلبة المزاج + مرحلة البلوغ

اما الولد بيتغير هرموناته فى مرحلة البلوغ وبرضه مع ضعف ثقتة فى نفسة وقدراته

4 – الأدوية

بعض الأدوية ليها اثار جانبية فظيعه على كمياء المخ واللى بدورها بتسبب تقلب المزاج ,

ومن اشهر الأدوية المسببة للحالة دى هى ادوية
( مضادات الإكتئاب – الأدوية اللى بتحتوى على هرمونات – المخدرات , والمهدئات )

5 – الإجهاد

والإجهاد لية دور ملحوظ فى حياتنا وبنشوفه كتير , وهو ان شغلك الكتير بيخليك مش قادر تنام , وبالتالى مخك تعبان وعايز يرتاح , واللى بيسبب تصرفات كتير بنعملها مع الناس اللى حوالينا , زى الغضب المفاجئ والصدمات والتوتر الزائد (( بمعنى اخر تقلب المزاج المفاجئ ))

6 – الأمراض البدنية

بعيدا عن الأمراض النفسية اللى ذكرناها فى اول المقالة , فية بقى الأمراض البدنية , واللى بتصيب دايما المخ او الجهاز العصبى او بعض خلايا المخ

زى السرطان وعدد كبير من الأورام , ومعاهم بتتدمر اجزاء من الخلاية العصبية او من خلايا المخ  , او عن طريق استئصال الخلايا المريضه دى وده طبعا لية اثر كبير فى النفس وكفائة الجسم والمخ , واللى بدورة بيسبب (( تقلب المزاج ))

طب نعالج ده ازاى ؟؟

العلاج :-

1 – ممارسة الرياضه

الرياضة ليها فوائد ودور كبير فى علاج امراض نفسية وجسدية كتير , لأن الرياضة عموما بتنشط الدورة الدموية جدااااا , + انها مع العرق وزيادة كفائة الجسم والكلى بيتم طرد السموم من الجسم عن طريق البول , وطرد الأملاح الزائده عن طريق العرق

2 – الحصول على مساعدة متخصص

للمرة المليون , مش عيب تستشير حد متخصص أو طبيب نفسى عن مشاكلك ,

لأن ببساطة الدكتور ده فضل كتير من عمرة يدرس الإنسان وسلوكة وجسمة والتغيرات اللى بتحصل فى جسمة وفى نفسة وبالتالى هو اكثر خبرة مننا بجسمنا ونفسنا وبالأمراض اللى بتصيبنا سواء نفسية او جسدية

3 – الملاحظة

لو حسيت انك شخص متقلب المزاج حاول تدور فى الأسباب اللى ذكرناها فى اول المقالة عن سبب تغير مزاجك الفورى جايز تقدر تحل السبب ده من غير طبيب

وحاول تلاحظ المواقف اللى بتسببلك تغير المزاج وتقضى عليها تماما

4 – اتكلم

خرج كل اللى جواك من مشاعر اول بأول مع عيلتك أو اصدقائك أو حد بتثق فيه  بشكل مستمر و إلا كتمان المشاعر بيخليك عرضة لأمراض كتير نفسية وجسدية

5 – دور على اللى بتحبة واعملة

جايز الشغل اللى انت فية مش مريحك , ممكن تغيرة عادى جدااا

دور على هواية ليك وخصص ليها وقت لإن ده هيساعدك جدااا على الإسترخاء والوصول للإستقرار النفسى

6- الأكل

غير انك تنظم اكلك علشان جسمك يكون كامل من كل العناصر , فية بعض الأكلات ممكن تساعدك على استقرار مشاعرك ومزاجك زى :-

الليمون والقرفة والريحان والشوفان

وأخيرا حاول تحافط على الناس اللى حواليك ومزعلهمش

#عافر